All posts by : Kristina

Во периодот кога празниците нè потсетуваат на вистинските вредности – заедништвото, солидарноста и човечката грижа – Рудникот Бучим и оваа година реализираше новогодишна иницијатива насочена кон најмладите и кон пошироката заедница.

По повод Новата година, рудникот додели вкупно 1.200 новогодишни пакетчиња, кои беа наменети за децата на вработените, лица со интелектуална попреченост, сите деца од детските градинки во Општина Радовиш и Општина Конче, деца и млади од локалните спортски боречки клубови, како и за учесниците во традиционалниот празничен настан Бадникова литија, новогодишната програма „Средба со Дедо Мраз“ во организација на Општина Радовиш, Црвен крст – Радовиш, како и други локални здруженија и организации.

Со оваа активност, Бучим уште еднаш ја потврдува својата долгорочна заложба за одговорно и одржливо делување, инвестирајќи во вредности кои ја надминуваат деловната рамка и создаваат трајна позитивна вредност за заедницата.

„Детската радост и искрената насмевка се најчистиот израз на празничниот дух. Грижата за децата и поддршката на ранливите категории се одраз на вредностите што ги негуваме како компанија и како дел од оваа заедница,“изјави заменик управителот за одржлив развој, Кристина Крстева

Заменик управителот Ивица Карапетров истакна дека општествената одговорност претставува суштински дел од корпоративната култура на компанијата: „ Бучим е нераскинлив дел од заедницата во која работи. Нашата обврска не е само економска, туку и човечка – да придонесуваме за благосостојба, еднакви можности и празници исполнети со радост за сите.“

Рудникот и во иднина ќе продолжи со реализација на општествено одговорни активности, со фокус на поддршка на децата, социјалната инклузија и одржливиот развој, водејќи се од принципите на одговорно корпоративно управување и грижа за луѓето.

Среќни новогодишни и божиќни празници!

Во рамки на својата општествена одговорност и континуираната грижа за вработените и нивните семејства, рудникот Бучим на 21 декември 2025 година организираше предновогодишна прослава за децата на вработените.

Настанот обедини 110 деца и нивните родители и беше осмислен како празнична, едукативна и хуманитарна активност, со јасна цел да се зајакнат чувството на припадност, заедништво и солидарност, како и да се поттикнат позитивни вредности кај најмладите.

Програмата беше прилагодена на возраста на децата и вклучуваше детска театарска претстава со наслов „Каде е Дедо Мраз?“, како и интерактивни активности во кои децата активно учествуваа. Посебен сегмент од настанот беше хуманитарната акција за донирање играчки, преку која децата беа охрабрени да споделуваат и да развиваат чувство на емпатија и општествена одговорност. Собраните играчки ќе бидат донирани на Црвениот крст – Радовиш, со цел да им бидат доделени на деца од социјално ранливи категории.

Оваа иницијатива има двоен ефект – од една страна создава радосно и безбедно празнично искуство за децата на вработените, а од друга страна придонесува кон развој на култура на солидарност и активно учество во општествено одговорни активности уште од најрана возраст.

Со ваквите активности, Бучим ја потврдува својата заложба за градење позитивна и поддржувачка работна средина, во која семејните вредности и грижата за луѓето се составен дел од корпоративната култура. Истовремено, преку вклучување на децата во хуманитарни активности, компанијата придонесува кон развој на социјална свест, емпатија и чувство на солидарност кај најмладите.

„Грижата за вработените не завршува на работното место – таа ги опфаќа и нивните семејства. Преку вакви настани создаваме позитивна и поддржувачка средина, а истовремено ги охрабруваме децата да ги развиваат вредностите на солидарност, споделување и заедништво. Ова е дел од пристапот на работењето на Бучим“изјави Алдана Лоровски Ристовски, заменик-раководител на службата за човечки ресурси.

Со оваа иницијатива, Бучим уште еднаш ја потврдува својата определба активно да придонесува кон позитивни општествени вредности во заедницата.

Радовиш, 9 декември 2025 – Заврши административната постапка за присоединување на рударско-геолошкиот комплекс Боров Дол кон Бучим, со што двата рударски комплекси официјално продолжуваат да функционираат како еден правен субјект. Со ова се зацврстува единствениот оперативен и управувачки модел, што ќе придонесе за уште поголема ефикасност и транспарентност во работењето на компанијата во целост.

Ова претставува стратешки чекор што овозможува поефикасно планирање и управување со ресурсите, унапредени процеси и појасна корпоративна структура, подобрена усогласеност со меѓународните стандарди и ESG принципите, зголемена транспарентност и стабилност во работењето, како и следење на единствена долгорочна визија за развој на целиот комплекс.

Присоединувањето не подразбира никаква промена во управувачката структура. Исто така, условите на воспоставените партнерства, договорните односи и обрвски со добавувачи, институции и други заинтересирани страни, остануваат непроменети.

Во изминатите денови беше спроведена стандардната административна постапка за техничкиот пренос на сите вработени во рамките на единственото правно лице. Преносот беше изведен континуирано, без какви било промени во работните места, правата или обврските на вработените. Статусот и сите бенефиции на вработените останаа непроменети. Техничкиот пренос не влијаеше врз работните процеси ниту врз редовното извршување на обврските.

“Присоединувањето на Боров Дол кон Бучим ни овозможува да работиме како единствен систем, во рамки на нашата Групација, со зајакнати операции и повисок степен на координација. Ова претставува значаен чекор кон модернизација, континуирано подобрување и понатамошно унапредување на одржливото рударство во регионот,“ изјави Ивица Карапетров, заменик генерален директор на Бучим.

Со новата интегрирана структура, рудникот Бучим продолжува да гради стабилна, модерна и конкурентна компанија, подготвена за долгорочни предизвици и инвестициски планови.

Во рамки на заложбите за унапредување на здравјето и благосостојбата на вработените, Друштвото ја реализираше годинешната иницијатива „Мовембер“ – глобално движење насочено кон подигнување на свеста за машкото физичко и ментално здравје.

На 26 ноември 2025 година беше организирана стручно модерирана панел-дискусија, посветена на теми поврзани со менталното здравје кај мажите, важноста од превентивни прегледи, најчестите здравствени ризици и потребата од намалување на стигмата при отворање на здравствени теми. На дискусијата учествуваа медицински и психолошки стручни лица, а вработените имаа можност да поставуваат прашања и да разговараат за теми кои вообичаено се поретко отворени во јавен контекст. Настанот уште еднаш ја истакна важноста на редовната превенција и раното препознавање на здравствениот ризик.

Во соработка со ЈЗУ Здравствен дом Радовиш, Друштвото овозможи бесплатно и доверливо тестирање на PSA тумор маркер за сите вработени мажи над 45-годишна возраст. Прегледите се организирани да се спроведат во периодот од 26 ноември до крајот на месец ноември 2025 година, со почитување на принципите на доброволност и медицинска доверливост и без нарушување на редовниот работен процес.

Во рамки на иницијативата беа организирани и дополнителни активности насочени кон подигнување на свесноста за машкото здравје, меѓу кои: анонимна анкета подготвена со цел да се идентификуваат темите, прашањата и здравствените дилеми што ги интересираат вработените и да се адресираат во рамки на панел-дискусијата; симболичен „ден на поддршка“ обележан од страна на женските колешки; како и доделување симболични подароци на вработените мажи. Активностите имаа за цел да поттикнат отворен разговор за здравствените навики, да ја засилат културата на меѓусебна поддршка и да ја истакнат важноста на превенцијата како дел од грижата за личното здравје.

Алдана Лоровски-Ристовска, Заменик раководител на човечки ресурси, истакна дека ваквите иницијативи се значајни бидејќи во фокус го ставаат човековиот аспект на работната средина: „ Воспоставувањето работна средина во која вработените можат слободно да разговараат за своето здравје и да добијат навремени информации и поддршка е значајно за нивната целокупна благосостојба. Активностите во рамки на ‘Мовембер 2025’ ја зајакнуваат културата на отвореност и меѓусебна поддршка, придонесувајќи за средина во која секој се чувствува слушнат и ценет. “

Кристина Крстева, Заменик управител за одржлив развој, ја нагласи важноста на интегрирањето на ваквите програми во поширокиот ESG пристап на Друштвото „ Грижата за вработените е суштински елемент на социјалната компонента од ESG рамката и претставува основа за стабилно и одговорно работење. Друштвото прави конкретни чекори кон поддршка на физичкото и менталното здравје, создавајќи работна средина која ја става безбедноста и човечноста во срцето на секојдневното работење.“

Како и досега, Друштвото останува насочено кон програми и мерки кои придонесуваат за физичкото и менталното здравје на вработените. Резултатите од анкетата и препораките од панел-дискусијата ќе бидат земени предвид при планирањето на активности за 2026 година, со цел понатамошно унапредување на корпоративните практики за здравје и благосостојба на вработените во Бучим.

Во рамките на својата долгорочна заложба за поддршка на образованието и поттикнување на интересот кај младите за природните и техничките науки, ДПТУ „Бучим“ ДООЕЛ Радовиш уште еднаш ги отвори вратите на своите постројки за учениците од ООУ „Кирил и Методиј“ од с. Ораовица.

Учениците реализираа едукативна посета на хемиската лабораторија во рамките на производствената единица Лужење, каде што имаа можност одблиску да се запознаат со современите процеси на добивање катоден бакар, со аналитичките постапки и контрола на квалитет, како и со примената на хемијата во индустриските процеси.

Посетата се одвиваше како дел од наставните активности по предметот Хемија и природни науки. Во рамките на програмата, претставниците на рудникот одржаа кратка презентација за историјата, значењето и придонесот на рудникот во развојот на локалната заедница, по што следеше практична демонстрација на лабораториски анализи и мерења.

Оваа активност претставува дел од континуираната програма на едукативни посети што Бучим ја реализира во изминатиот период, откако рудникот ги отвори своите врати за посетители со јасна мисија – да ја приближи рударската индустрија до младите генерации, да ја покаже практичната вредност на науката и да поттикне интерес кон инженерски, технолошки и природно-научни насоки на образование.Преку ваквите посети, компанијата активно гради врска меѓу образованието и индустријата, претворајќи ја рударската технологија во живо училиште за идните истражувачи, инженери и научници.

„Посетите на учениците се еден од најубавите сегменти на нашата работа – тие внесуваат свежа енергија и искрено љубопитство. Во Бучим веруваме дека токму овие млади луѓе се иднината на нашата заедница, и затоа со срце ги поддржуваме ваквите едукативни активности,“ изјави Кристина Крстева, заменик-управител за одржлив развој на Бучим.

Со отворањето на рудникот кон јавноста и редовното организирање на едукативни посети, Бучим продолжува да ја гради својата улога како општествено одговорна компанија која го негува партнерството со образовните институции и вложува во создавање на мотивирани, образовани и свесни генерации – идните носители на развојот на регионот.

Посветеност на младите инженери, енергетската ефикасност и одржливиот развој

ДПТУ „Бучим“ ДООЕЛ Радовиш и втора година по ред ја продолжува својата поддршка на младите инженери и истражувачи, преку учество како златен спонзор на студентската конференција СКЕЕОР 2025 – „Енергетска ефикасност и одржлив развој“, организирана од Факултетот за електротехника и информациски технологии – УКИМ Скопје (ФЕИТ).

Оваа конференција претставува најголема студентска платформа во земјата за промоција на енергетска ефикасност, иновативни зелени технологии и практични решенија за одржлива иднина. СКЕЕОР ја обединува академската заедница, идните инженери и индустриските партнери во заедничка мисија за зголемување на свеста за обновливите извори на енергија, циркуларната економија и енергетската транзиција.

Тринаесеттото издание на конференцијата се одржа од 28 до 31 октомври 2025 година и ги опфати најактуелните теми од современата енергетика: обновливи извори на енергија, паметни електрични мрежи, дигитализација и автоматизација, е-мобилност, примена на вештачка интелигенција и циркуларна економија. Настанот создаде мост меѓу академијата и индустријата, овозможувајќи им на студентите да презентираат свои научни трудови и да разменат идеи со претставници од водечки компании и институции. Со тоа, СКЕЕОР се потврдува како платформа каде се раѓаат иновации, инженерски решенија и одговорни идеи за иднината.

Во рамки на конференцијата, презентација одржа  Власто Стоименовски, главен енергетичар на Бучим, кој ги презентираше активностите и резултатите на компанијата во доменот на енергетската оптимизација, примена на технологии и интегрирање на ESG принципите во рударството.

„Токму конференции како СКЕЕОР создаваат силна врска меѓу академијата и индустријата – таму се раѓаат идеите што подоцна се претвораат во реални, применливи решенија. Енергетската транзиција не може да се постигне без млад, стручен и мотивиран кадар кој ја разбира важноста на интеграцијата на технологијата, ефикасноста и одржливоста во секој производствен процес,“ нагласи Власто Сотименовски, главен енергетичар на Бучим.

Тој додаде дека Бучим континуирано инвестира во модернизација на процесите, воведување на енергетски ефикасни системи и намалување на емисиите на CO₂, со што рударството го трансформира во одговорен, технолошки напреден и еколошки свесен сектор.

Присуството на Бучим на СКЕЕОР е дел од пошироката корпоративна стратегија за интеграција на ESG принципите – заштита на животната средина, општествена одговорност и добро корпоративно управување. Преку континуирана соработка со академската заедница, компанијата поттикнува развој на младите професионалци и гради партнерства кои го спојуваат знаењето, иновацијата и практичната примена.

„Бучим ја гледа одржливоста не само како дел од корпоративна стратегија, туку како заедничка одговорност кон општеството и идните генерации. Поддршката на СКЕЕОР е потврда на нашата заложба да вложуваме во младите, во знаењето и во иновациите што ќе ја обликуваат енергетската иднина на земјата,“ изјави Кристина Крстева, Заменик управител за одржлив развој на Бучим.

Поддршката на СКЕЕОР и други академски иницијативи претставува дел од заложбата на Бучим да инвестира во човечки капитал, технолошки развој и зелена економија. Kомпанијата останува посветена на одговорно рударство, примена на иновативни технологии и зајакнување на врските меѓу индустријата и образованието.

На шеснаесеттото стручно советување со меѓународно учество „Подекс–Повекс ’25“, кое викендов ги обедини највлијателните имиња од рударската фела, особено внимание привлече панел-дискусијата посветена на темата „Патот кон одржлив развој во рударството“.

На панелот учествуваа Ивица Карапетров, заменик генерален директор на рудникот за бакар Бучим, проф. д-р Зоран Панов и Андреј Кепески, менаџер за експлоатација на каменоломи и развој на минерални суровини во Цементарница Усје. Панелистите дискутираа за визијата за новата ера на рударството – ера во која технологијата, одговорноста и луѓето стојат рамо до рамо.

Изјава на Ивица Карапетров: „Одржливото рударење е идеологија на водење бизнис, не само документ“

„Би почнал од тоа да дефинираме што е одржливо рударење. Јас би го дефинирал вака – тоа е одговорно, рационално и профитабилно експлоатирање на минералните ресурси со минимален импакт врз животната средина, водејќи сметка и за идните генерации . Не се работи тука за документи, туку за идеологија на водење бизнис, идеологија на носење одлуки и решенија. Може ли одржливото да биде и профитабилно? Може – и мора. Но, потребно е време. Потребна е промена на свеста – кај стручната фела, кај раководството, кај средниот менаџмент и кај секој вработен. Таа промена треба да ја покрене топ менаџментот, а потоа да се спроведе низ сите нивоа на компанијата. Ова е долгорочен, но трпелив процес – кој бара континуитет, посветеност и реална волја да се менуваат навиките и пристапите кон работењето. Зборуваме за профитабилно и рационално рударење. Ако не е профитабилно – ќе се затвори, тоа е реалноста на бизнисот. Но, одржливоста не започнува и не завршува со рудниците. Таа мора да биде присутна и кај изведувачите, подизведувачите, добавувачите, работниците и локалната заедница. Одговорноста е заедничка – не треба да се вперува прст само во рудниците, затоа што одржливиот развој се гради заедно, преку соработка, разбирање и заедничка посветеност. Само така сите ние можеме да бидеме дел од решението, а не од проблемот.“

Во своето излагање Карапетров нагласи дека традиционалното рударство не може да биде целосно одржливо, но може да стане порегенеративно, преку создавање нова вредност во секоја фаза од работењето – од рекултивација на теренот и повторна употреба на водата, до долгорочна грижа за заедницата.

Една од клучните теми што се наметна во дискусијата беше недостигот на квалификувана работна сила и потребата да се инвестира во образование и поттикнување на младите да се вклучат во оваа индустрија.

Во таа насока, Карапетров истакна дека „Бучим“ се позиционира како општествено одговорен работодавец, кој активно инвестира во развој на човечки капитал преку стипендии за студенти, дуални програми со факултетите, вработување млади инженери и поддршка на образовни иницијативи во локалните заедници.

Советувањето, на кое присуствуваше и министерката за енергетика, рударство и минерални суровини, беше одлична можност за размена на искуства меѓу реалниот рударски сектор и академската заедница, како и за дискусија на актуелни теми и поставување на визијата за иднината на индустријата.

Со многу енергија, тимски дух и позитивна атмосфера, нашите колеги ја претставија компанијата на најголемиот спортски настан во земјата, кој викендов го претвори Скопје во вистински маратонски град.

Во трката на 5 километри учествуваа петмина вработени од Бучим, додека уште четворица беа дел од штафетниот маратон (42 км). Во силна корпоративна конкуренција, тимот на Бучим го освои високото 8-мо место, со што уште еднаш потврди дека упорноста, дисциплината и соработката се вредности што ги споделуваме не само во работата, туку и надвор од неа.

„Горди сме на нашиот тим кој со голем ентузијазам и заедништво го претстави Бучим на Виз Ер Скопскиот маратон. Ова учество не е само спортски успех, туку и потврда на нашата корпоративна култура , дека кога работиме и делуваме заедно, можеме да постигнеме одлични резултати. Ваквите активности се дел од нашата заложба за промовирање на здрав и активен начин на живот, тимски дух и меѓусебна поддршка,“истакна раководителот на служба за човечки ресурси на Бучим, Мирослав Петров.

Со ова учество, Бучим уште еднаш ја потврди својата посветеност кон промовирање на здрави вредности, спортски дух и заедништво, кои се составен дел од корпоративната култура на компанијата.

Браво за нашиот тим – горди сме на вас!

Радовиш, 29 август 2025 година – Со свеченост во присуство на претседателот на Владата, Христијан Мицкоски,  соработници и претставници на локалната заедница, рудниците Бучим и Боров Дол го одбележаа Денот на македонските рудари – 28 август, празник кој е симбол на трудот, посветеноста и истрајноста на рударите.

Во своето обраќање, заменик генералниот директор на Бучим и Боров Дол, г-дин Ивица Карапетров, нагласи: „Со претстојното припојување на Боров Дол кон Бучим започнуваме ново поглавје во македонското рударство. Градиме стабилна и одржлива компанија која не е насочена единствено кон производството, туку и кон луѓето – вработените и заедницата. Се залагаме за создавање на средина во која секој вработен ќе работи безбедно, ќе има можност за професионален развој и ќе придонесува кон трајна вредност за идните генерации.“

Во чест на празникот, Бучим ќе донира опрема во висина од 40.000 евра на Здравствениот дом во Радовиш за целосна дигитализација на рендген машината. Со оваа донација ќе се овозможи побрза и поефикасна здравствена услуга, со што компанијата уште еднаш ја потврдува својата посветеност кон подобрување на квалитетот на живот за локалната заедница.

Сите вработени во компанијата и оваа година добија парични награди за својот придонес во успехот, а 24 најуспешни беа одликувани со дополнителни бонуси како признание за нивните извонредни резултати, труд и посветеност. Наградите и признанијата се дел од стратегијата на „Бучим“ за вреднување на човечкиот капитал како најважен ресурс во рударството.

Радовиш и Бучим секоја година на 28 август потсетуваат на историскиот Штрајк на рударите во Лојане во 1929 година – чин што остави длабока трага во борбата за достоинство и работнички права, и кој претставува вечен потсетник дека рударството е дел од идентитетот и културното наследство на македонскиот народ.

Вчерашната прослава беше заокружена со концерт на групите „Нокаут“ и „Дивље Јагоде“ во центарот на Радовиш, со што празникот доби и културна димензија, обединувајќи ја заедницата во духот на почит и благодарност кон рударите.