All posts by : Kristina

На 17.07.2026 година, во Музејот на љубовта и уметноста во Радовиш, беше одржана изложба на детските цртежи создадени во рамки на креативната и едукативна работилница „Минералите низ детските очи“, организирана од рудникот Бучим за децата на вработените.

Изложбата претставува продолжение на активноста од 14.06.2026 година, кога најмладите преку игра, разговор, боја и цртеж го претставија својот поглед кон минералите, природата, рударството и работата на своите родители.

Во рамки на изложбата беа претставени 36 детски дела, различни по својот израз, идеја и порака. Бучим ги откупи сите дела, кои ќе бидат поставени во просториите на Друштвото и трајно ќе ги красат ѕидовите на Бучим.

Со ова, детските цртежи не остануваат само спомен од една работилница, туку стануваат дел од секојдневната работна средина и потсетување дека зад секој процес стојат луѓе, семејства, труд и заедничка припадност.

Оваа иницијатива има и поширока општествена вредност. Таа создава простор во кој детскиот глас се слуша и вреднува, ја приближува индустријата до најмладите на топол и разбирлив начин и ја поврзува работната средина со семејството, културата и локалната заедница. На децата им се испраќа јасна порака дека нивната креативност, труд и идеи имаат значење и свое место во заедницата на Бучим.

„Сакавме детските идеи да продолжат да живеат и по завршувањето на работилницата и изложбата, па затоа нивните дела ќе добијат трајно место во просториите на Бучим. На тој начин, нивната креативност добива вистинско признание и свое место во нашата работна средина. За нас, овие цртежи се многу повеќе од уметнички дела – тие се дел од приказните на нашите вработени, нивните семејства и заедницата што заедно ја градиме,“ изјави Кристина Крстева, директор за одржлив развој на ДПТУ „Бучим“ ДООЕЛ Радовиш.

ДПТУ „Бучим“ ДООЕЛ Радовиш ќе продолжи да поддржува иницијативи кои ја поттикнуваат детската креативност, ја зајакнуваат врската со семејствата на вработените и создаваат трајни вредности за локалната заедница.

Им благодариме на сите мали уметници за нивната фантазија, посветеност и искрен поглед кон светот на минералите.

Со ревидираната Политика за човекови права, Бучим ја утврдува рамката за заштита на луѓето, управување со ризиците и одговорно донесување одлуки.

Бучим ја објави ревидираната Политика за човекови права, со што дополнително ја зајакнува рамката преку која Друштвото постапува по прашања што можат да влијаат врз вработените, изведувачите, деловните партнери и локалните заедници.

Во рударската индустрија, деловните одлуки се тесно поврзани со условите за работа, безбедноста и здравјето при работа, работничките права, управувањето со изведувачите и потенцијалните влијанија врз околните заедници. Поради тоа, почитувањето на човековите права претставува суштински дел од одговорното управување со оперативните и социјалните аспекти, како и од градењето и одржувањето долгорочна доверба со засегнатите страни.

Политиката утврдува јасни принципи во однос на почитувањето на човековото достоинство, еднаквиот третман, недискриминацијата, безбедната и достоинствена работна средина, како и заштитата од вознемирување и одмаздничко постапување. Таа, исто така, ги дефинира очекувањата на Друштвото од изведувачите и деловните партнери и обезбедува достапни канали преку кои може да се пријават одредени прашања или загрижености, кои ќе бидат разгледани објективно и непристрасно.

„Одговорното рударство бара јасни принципи, отворена комуникација со засегнатите страни и подготвеност за навремено постапување секогаш кога може да се појават ризици за луѓето. Со ревидираната Политика за човекови права ја зајакнуваме рамката што ги насочува нашите одлуки, деловни односи и одговорноста на сите нивоа во организацијата“, изјави Александр Раков, генерален директор на Бучим.

За Бучим, почитувањето на човековите права е составен дел од системот на корпоративно управување. Тоа придонесува потенцијалните влијанија врз луѓето и заедниците систематски да се земаат предвид при планирањето и спроведувањето на деловните активности.

Доследната примена на Политиката придонесува кон одговорно постапување, јасно дефинирани надлежности и повисоко ниво на отчетност во односите со вработените, изведувачите, деловните партнери, локалните заедници и другите засегнати страни.

Во Бучим беше реализирана развојна програма за 30 претставници од средниот менаџмент, во соработка со NLP Macedonia – Center for Business Psychology SEE.

Програмата е дел од поширокиот пристап на компанијата кон континуирано надградување на знаењата и вештините на вработените, во согласност со нивните професионални улоги, одговорности и потребите на работењето.

Во современа рударска и производствена средина, развојот на човечкиот капитал е важен предуслов за безбедно, ефикасно и одговорно управување со сложените процеси. Поради тоа, Бучим поддржува различни форми на стручно усовршување – од технички и безбедносни обуки, до развој на лидерски, организациски и управувачки компетенции.

Оваа програма беше насочена кон практичните аспекти на раководењето: јасно поставување задачи и очекувања, координација и мотивирање на тимовите, донесување одлуки, управување со промени и конструктивно постапување во различни работни ситуации.

Преку практични вежби, дискусии и анализа на примери од секојдневното работење, учесниците разменуваа искуства и разгледуваа пристапи применливи во нивната непосредна работа со луѓето и процесите.

За Бучим, вложувањето во вработените не е ограничено на една организациска група или професионална област. Тоа е континуиран процес преку кој се развиваат техничкото знаење, безбедносните компетенции, управувачките способности и капацитетот на организацијата навремено да одговори на новите оперативни и технолошки барања.

Со ваквиот пристап, компанијата го задржува и надградува сопственото стручно знаење, создава услови за професионален развој и ја зајакнува основата за стабилно работење и добро корпоративно управување.

На 14.06.2026 година, ДПТУ „Бучим“ ДООЕЛ Радовиш организираше креативна и едукативна работилница за децата на вработените, на тема „Минералите низ детските очи“.

Работилницата беше дел од заложбите на Друштвото за градење работна средина во која вработените се гледаат не само преку нивната професионална улога, туку и како луѓе, родители и дел од пошироката заедница на Бучим. Преку вакви активности, рудникот ја потврдува својата определба да создава култура на припадност, почит и грижа кон вработените и нивните семејства.

„За нас, грижата за вработените не завршува со работниот ден. Бучим е заедница изградена од луѓе, нивните семејства, знаење и меѓусебна доверба. Токму затоа, втора година по ред ја развиваме оваа практика преку која децата на нашите вработени имаат можност да се почувствуваат добредојдени, да го запознаат светот во кој нивните родители секојдневно работат и да го доживеат рударството преку љубопитност, креативност и детска фантазија. Особено ни е важно што нивните цртежи и идеи не остануваат само дел од работилницата, туку продолжуваат да живеат преку изложба, како искрен и креативен поглед на најмладите кон природата, минералите и работата на Бучим,“ изјави Кристина Крстева, директор за одржлив развој на ДПТУ „Бучим“ ДООЕЛ Радовиш.

Наместо класична лекција, најмладите имаа можност преку игра, боја, разговор и цртеж да го откриваат светот на минералите на начин близок до нивната возраст. Тие поставуваа прашања за тоа што има во земјата, како изгледаат минералите, зошто се важни и што всушност работат нивните родители.

Минералите не се само дел од рударството. Тие се дел од земјата, природата и од многу нешта што ги користиме секој ден. Токму затоа, ваквите активности имаат посебна вредност, бидејќи ја доближуваат индустријата до најмладите на едноставен, топол и разбирлив начин.

Бучим и понатаму ќе продолжи да поддржува активности кои ја зајакнуваат врската меѓу рудникот, вработените и нивните семејства, како важен дел од организациската култура и долгорочната посветеност кон луѓето.

Им благодариме на сите мали учесници за нивната љубопитност, фантазија и искрен поглед кон светот на минералите.

Технолошките промени, дигитализацијата и сè повисоките стандарди за одржливо работење ја прават потребата од високо квалификувани инженерски кадри поголема од кога било досега. Во средина која постојано се менува, знаењето, иновациите и способноста за адаптација стануваат основа за долгорочна конкурентност и одржлив развој.

Современото рударство денес е високо технолошка индустрија која се потпира на напредна механизација, дигитални решенија, аналитички пристап и континуирано унапредување на оперативните процеси. Ваквата трансформација бара нова генерација инженери кои, покрај силната теоретска основа, поседуваат практично разбирање на комплексните индустриски системи и процеси.

Оттука, градењето силни врски помеѓу образованието и индустријата претставува важен предуслов за развој на кадри подготвени да одговорат на потребите на современиот пазар на труд и на предизвиците што ги носат технолошкиот напредок и енергетската транзиција.

Во овој контекст, рудникот Бучим денес го посетија околу 30 студенти од Машинскиот факултет при Универзитетот „Гоце Делчев“ – Штип. Преку непосреден увид во инженерските и оперативните процеси, студентите се запознаа со практичната примена на знаењата и со улогата што инженерството ја има во обезбедувањето безбедни, сигурни и ефикасни индустриски операции.

Поддршката на образованието и развојот на младите таленти претставува инвестиција во иднината на индустријата. Создавањето можности за учење, професионален развој и размена на знаења придонесува кон развој на човечки капитал кој ќе биде двигател на иновациите, продуктивноста и одржливиот раст во годините што следат.

Во Бучим веруваме дека долгорочната вредност се создава преку луѓето. Затоа, вложувањето во идните генерации инженери останува важен дел од нашата определба за одговорно работење и одржлив развој.

Рудникот продолжува да ја развива соработката со Факултетот за природни и технички науки при Универзитетот „Гоце Делчев“ – Штип, со цел поддршка на практичната едукација и доближување на студентите до реалните индустриски процеси и можностите што ги нуди рударскиот сектор.

Во рамки на континуираната соработка со Факултетот за природни и технички науки при Универзитетот „Гоце Делчев“ – Штип, Бучим беше посетен од 13 студенти од прва и втора година од насоките геологија и рударско инженерство, придружувани од професор од факултетот.

За време на посетата, студентите имаа можност непосредно да се запознаат со процесите на геолошки истражувања, површинска експлоатација и преработка на минерални суровини, како и со современите технологии, механизација и работни процеси што се применуваат во рударството.

Ваквите активности претставуваат значаен дел од континуираната соработка помеѓу Бучим и УГД – Штип и имаат за цел да придонесат кон поголем интерес на младите за техничките и инженерските професии, како и да овозможат директно поврзување на студентите со индустријата уште во текот на нивното образование.

Бучим останува посветен на поддршка на младите кадри и создавање можности за нивен професионален развој, препознавајќи дека идните инженери и геолози претставуваат важен дел од развојот на современата индустрија.

Додека сè повеќе компании зборуваат за недостиг на стручен кадар, „Бучим“ веќе континуирано инвестира во младите генерации што утре ќе ја движат индустријата.

По иницијатива на Бучим, 38 ученици од СОУ „Коста Сусинов“ – Радовиш, вклучени во програмата за дуално образование, реализираа стручна посета на рудникот САСА, со цел да стекнат поширок увид во современите рударски практики, технолошките процеси и организацијата на работата во индустријата.

Посетата претставуваше можност учениците директно да се запознаат со современа механизација, безбедносни стандарди, технолошки системи и организација на работните процеси, но и да видат различни пристапи и практики што денес се применуваат во современото рударство.

За учениците, ова не беше само теренска посета — туку реално искуство што им овозможи подобро да ја разберат професијата за која се образуваат и можностите што ги нуди индустријата.

Токму тоа е и суштината на дуалното образование — младите уште за време на образованието да учат во реална работна средина, да стекнуваат практични вештини и директно да се поврзуваат со индустријата.

Во рамки на програмата за дуално образование, Бучим има обучено околу 20 ментори од различни сектори — вработени во компанијата кои, покрај своите редовни работни обврски, одвојуваат дел од своето работно време за практична едукација, менторска поддршка и професионален развој на учениците.

Резултатите од ваквиот пристап веќе се видливи — четворица ученици од дуалното образование досега се вработени во компанијата, што претставува конкретен пример за успешно поврзување на образованието со реалниот сектор.

Преку практична работа, менторска поддршка, теренски посети и директен контакт со индустријата, Бучим создава можности младите уште денес да го изградат своето знаење, искуство и професионална иднина.

Воедно, Бучим упатува благодарност до рудникот САСА за гостопримството, отвореноста и поддршката во реализацијата на посетата, како и за придонесот кон практичната едукација и професионалниот развој на младите генерации.

Затоа што иднината на индустријата не започнува со машините — туку со луѓето што ќе знаат како да ги управуваат.

Во време кога светот сè погласно зборува за автоматизација, вештачка интелигенција и професиите на иднината, во Радовиш веќе се создава генерација млади луѓе кои уште денес учат да создаваат, програмираат и размислуваат како идни инженери.

Она што започна како STEM образовна иницијатива, денес прераснува во една од највпечатливите локални приказни за вложување во знаење, талент и идни можности.

Преку програмата што ја реализира Бучим, децата на вработените, како и талентирани ученици од Општина Радовиш, добиваат пристап до современа STEM едукација базирана на практична работа, роботика, автоматизација и инженерски концепти.

Со модел на кофинансирање од 50%, младите учесници работат на LEGO Education платформи, развиваат роботски модели и учат преку реални инженерски предизвици, логичко размислување и тимска работа.

Програмата започна во учебната 2024/2025 година и континуирано опфаќа помеѓу 23 и 26 учесници месечно. Покрај децата на вработените, по иницијатива на компанијата се вклучени и стипендисти од Радовиш кои покажале особен интерес и потенцијал за STEM областа.

Резултатите од програмата веќе се препознаваат и надвор од локалната заедница. На натпреварот FIRST LEGO League Explore 2026 во Скопје, тимот „Brick Raiders“ беше прогласен за апсолутен победник, додека останатите тимови освоија признанија за креативност, презентација и инженерски пристап.

Во рамки на програмата, младите имаа можност и непосредно да се запознаат со современи индустриски процеси, механизација и технолошки системи што се применуваат во рударството, добивајќи практичен увид во тоа како технологијата станува дел од современата индустрија.

Како дополнителна поддршка за најуспешните учесници, Бучим ќе кофинансира учество на 13 деца од победничкиот тим на интернационален летен STEM камп во Метаморфозис, Грција, каде младите ќе работат на роботика, алгоритми и практични инженерски проекти во интернационална и иновативна средина.

За компанијата, ова претставува вложување во идните генерации, техничкото образование и вештините што ќе ја обликуваат индустријата на иднината.

Од LEGO модели до титула апсолутни победници – приказната на овие млади луѓе покажува дека идните инженери, иноватори и креатори веќе растат тука, во Радовиш.